អំពីសំណេរតែងសេចក្តីអត្ថាធិប្បាយប្រៀបធៀប

ដូចម្តេចដែលហៅថា សំណេរតែងសេចក្តីអត្ថាធិប្បាយប្រៀបធៀប?

• តែងសេចក្តីបែបអត្ថាធិប្បាយប្រៀបធៀប គឺជាប្រភេទតែងសេចក្តីមួយប្រភេទដែលតម្រូវឲ្យ​អ្នកតែងលើកយកកម្មវត្ថុ (ពាក្យសម្តី ឃ្លា ប្រយោគ មតិ យោបល់ តួអង្គ វត្ថុ ស្នាដៃ...) មកធ្វើ​ការប្រៀបធៀប ថ្លឹងថ្លែង ស្វែងរកឲ្យឃើញលក្ខណៈដូចគ្នា និងលក្ខណៈខុសគ្នា និងរកឲ្យ​ឃើញ​ថា តើកម្មវត្ថុណាមួយមានលក្ខណៈប្រសើរជាង។

គន្លឹះដើម្បីស្គាល់ប្រធាន៖

• ពាក្យបង្គាប់៖ ចូរប្រៀបធៀប។ , ចូររកលក្ខណៈខុស និងលក្ខណៈដូច។ , ចូររកលក្ខណៈរួម និងលក្ខណៈដោយឡែក។
• ពាក្យចោទសួរ៖ តើមតិទាំងពីរដូចគ្នា ឬខុសគ្នា? , តើមតិទាំងពីរមានលក្ខណៈរួម ឬលក្ខណៈ​ដោយឡែកយ៉ាងដូចម្តេច? , តើមតិទាំងពីរមានលក្ខណៈដូចគ្នា ឬខុសគ្នាយ៉ាងណា?   

គម្រោងតែងសេចក្តី៖
ក. សេចក្តីផ្តើម៖

• លំនាំបញ្ហា៖ លើកយករឿងរ៉ាវនៅក្នុងកម្មវត្ថុប្រៀបធៀបមកបង្ហាញ។
• ចំណូលបញ្ហា៖ លើកយកកម្មវត្ថុប្រៀបធៀបមកបង្ហាញ។
• ចំណោទបញ្ហា៖ ចោទសួរបែបប្រៀបធៀប។ (តើ......ទាំងពីរខាងលើនេះមានលក្ខណៈដូចគ្នា​ និងខុសគ្នាបែបណាខ្លះ? ហើយមួយណាមានប្រសើរជាង?)

ខ. តួសេចក្តី៖

• ឃ្លាភ្ជាប់សេចក្តី
• ពន្យល់ពាក្យ (ប្រៀបធៀបតួអង្គមិនបាច់ពន្យល់ពាក្យទេ តែបើប្រៀបធៀបបញ្ហាពន្យល់ពាក្យ​ជាការចាំបាច់)
• ពន្យល់ន័យប្រធាន
• បកស្រាយប្រធាន

គ. សេចក្តីបញ្ចប់៖

• វាយតម្លៃប្រធាន (ឬកម្មវត្ថុប្រៀបធៀប)
• មតិចូលរួម

របៀបបកស្រាយប្រធានតែងសេចក្តីអត្ថាធិប្បាយប្រៀបធៀប៖

• ពន្យល់បកស្រាយលក្ខណៈដូចគ្នា ឬលក្ខណៈរួម
• ពន្យល់បកស្រាយលក្ខណៈខុសគ្នា ឬលក្ខណៈដោយឡែក
• សន្និដ្ឋានរួមរវាងទស្សនៈទាំងពីរ។