អំពីសំណេរតែងសេចក្តីអធិប្បាយពិភាក្សា

ដូចម្តេចដែលហៅថា តែងសេចក្តីបែបពិភាក្សា?

• តែងសេចក្តីបែបពិភាក្សា គឺជាតែងសេចក្តីមួយប្រភេទដែលតម្រូវឲ្យអ្នកតែងលើកយកមតិ​របស់ប្រធានមកពិចារណា វែកញែករកខុសត្រូវ រកល្អអាក្រក់ សមឬពុំសម មានប្រយោជន៍​ឬឥតប្រយោជន៍ ជាគុណឬជាទោស។ល។ ដើម្បីយកមតិទាំងអស់មកថ្លឹងថ្លែងមើល តើមតិ​ណាមួយសមរម្យជាង។
• ជាទូទៅប្រធានពិភាក្សា គឺមានមតិពុំសមស្របគ្នា ហើយច្រើនស្ថិតនៅលើទ្រឹស្តីបដិសំយោគ ដែលមាន៖ មតិទី១ (មតិស្រប), មតិទី២ (មតិផ្ទុយ), មតិសំយោគ ឬមតិពិភាក្សា។

 គន្លឹះដើម្បីស្គាល់ប្រធាន

• ការបញ្ចេញមតិ៖ គេពោលថា "......" , មតិមួយលើកឡើងថា "......" , មានទស្សនៈជាច្រើន​យល់ថា "......" , មានទស្សនៈខ្លះយល់ថា "......" ឯខ្លះទៀតថា "......" ទៅវិញ ។ល។
• ពាក្យចោទសួរ៖ តើអ្នកយល់យ៉ាងណា? , តើអ្នកយល់ដូចម្តេច? , តើមតិនេះត្រូវ ឬខុស?, តើមតិណាមួយត្រឹមត្រូវជាង? , តើមតិណាមួយសមរម្យជាង? , តើអ្នកមានយោបល់ដូចម្តេច​ដែរ? , តើមតិនេះគ្រប់គ្រាន់ហើយ ឬនៅ? , តើទស្សនៈខាងលើមួយណាត្រូវ មួយណាខុស?
• ពាក្យបង្គាប់៖ ចូរពិភាក្សា។ , ចូរវែកញែករកខុស ត្រូវ។ , ចូរពិចារណា។ , ចូរវិនិច្ឆ័យ។ , ចូររិះ​គន់។ល។

គម្រោងតែងសេចក្តីពិភាក្សា
 ក. សេចក្តីផ្តើម៖

• លំនាំបញ្ហា៖ និយាយពីបញ្ហាទូទៅទាក់ទងនឹងប្រធាន មិនវែងពេក មិនខ្លីពេក។
• ចំណូលបញ្ហា៖ លើកទស្សនៈប្រធានយកមកបង្ហាញ។
• ចំណោទបញ្ហា៖ ចោទសួរលើប្រធានតាមបែបពិភាក្សា។ (សូមមើល របៀបចោទសួរក្នុងតែងសេចក្តី​អត្ថាធិប្បាយបែបពិភាក្សា)

ខ. តួសេចក្តី៖

• ឃ្លាភ្ជាប់សេចក្តី
• ពន្យល់ពាក្យពិបាក ឬពាក្យគន្លឹះ
• ពន្យល់ន័យប្រធាន
• បកស្រាយមតិស្រប និងឧទាហរណ៍
• សរុបមតិស្រប
• ឃ្លាភ្ជាប់សេចក្តីចូលមតិផ្ទុយ (សូមមើល របៀបសរសេរឃ្លាភ្ជាប់សេចក្តីមុនចូលមតិផ្ទុយ)
• បកស្រាយមតិផ្ទុយ និងឧទាហរណ៍
• សរុបមតិផ្ទុយ
• សំយោគមតិ ឬមតិពិភាក្សា (សូមមើល អំពីសំយោគមតិ និងមតិពិភាក្សា)

គ. សេចក្តីបញ្ចប់៖

• វាយតម្លៃប្រធាន៖ មតិប្រធានត្រឹមត្រូវដែរ ឬទេ? 
• ទស្សនៈផ្ទាល់ខ្លួន៖ សំណូមពរ ឬមតិចូលរួមក្នុងការអភិវឌ្ឍ។

របៀបចោទសួរក្នុងសំណេរតែងសេចក្តីអត្ថាធិប្បាយពិភាក្សា

• បើប្រធានមានទស្សនៈតែមួយ

1. តើ......ត្រឹមត្រូវ ឬទេ?
2. តើ......សមស្រប ឬទេ?
3. តើ......ត្រូវ ឬខុស?
4. ................................................................................................................?

• បើប្រធានមានទស្សនៈពីរផ្សេងគ្នា

1. តើមតិទាំងពីរខាងលើ មួយណាត្រឹមត្រូវជាង?
2. តើមតិទាំងពីរខាងលើ មួយណាខុស មួយណាត្រូវ?
3. តើមតិទាំងពីរខាងលើ មួយណាសមរម្យជាង?
4. .................................................................................................................?

របៀបសរសេរឃ្លាភ្ជាប់សេចក្តីមុននឹងចូលមតិផ្ទុយ
ក្រោយពីសរុបមតិស្របរួច អ្នកសរសេរត្រូវសរសេរឃ្លាភ្ជាប់សេចក្តីជាលក្ខណៈសំណួរមុននឹងធ្វើ​ការបកស្រាយពីមតិផ្ទុយ។ គេអាចសរសេរចោទសួរបានថា៖

1. តើ......ពិតជាអ៊ីចឹងមែនឬ?
2. តើ......ពិតមែន ឬយ៉ាងណា?
3. .................................................................................................................?

អំពីសំយោគមតិ និងមតិពិភាក្សា

• សំយោគមតិ៖ ជាការផ្សំគ្នា ឬបំពេញគ្នាទៅវិញទៅមករវាងមតិស្រប និងមតិផ្ទុយ។
• មតិពិភាក្សា៖ ជាការថ្លឹងថ្លែងវិនិច្ឆ័យរវាងមតិស្រប និងមតិផ្ទុយ ដើម្បីប្រមើលមើលរកមតិ​ដែលត្រឹមត្រូវ។

* ចំណាំ៖
គេតែងធ្វើសំយោគមតិនៅពេល៖

• ប្រធានមានទស្សនៈមួយ ត្រូវខ្លះ ខុសខ្លះ
• ប្រធានមានទស្សនៈពីរបំពេញន័យឲ្យគ្នាទៅវិញទៅមក

គេតែងធ្វើមតិពិភាក្សានៅពេល៖

• ប្រធានមានទស្សនៈមួយ ត្រូវដាច់ខាត ឬខុសដាច់ខាត
• ប្រធានមានទស្សនៈពីរ ទស្សនៈមួយត្រូវដាច់ខាត និងមួយផ្សេងទៀតខុសដាច់ខាត